Phili 3 | KYG | STEP | Konaga'nimogitapae, hu'na, ge'nimo hu'na hano hugefe'mo huvanagi henaga ge'nimo afiyo. Ala kava nefe'mo lapamogaga aiyo. Lapa pai'nova gemo halate lapa paisuvafe'mo alaga o'nahae'niyanage'na lapa maesugetapa alagepa hutapa maisayafe'mo lapa nepauve.

Philippians 3

1 Konaga'nimogitapae, hu'na, ge'nimo hu'na hano hugefe'mo huvanagi henaga ge'nimo afiyo. Ala kava nefe'mo lapamogaga aiyo. Lapa pai'nova gemo halate lapa paisuvafe'mo alaga o'nahae'niyanage'na lapa maesugetapa alagepa hutapa maisayafe'mo lapa nepauve. 2 Mago vaya'mogimo afela kalagana hu'a mai'ne'a hosu ali'ya'mo ne'ali'a hosu kava'mo hu'a apakufamo lagau'a ne'apataya vaya'aife'mo ehetapiye. 3 Lagaemo alagepa kavatileti'mo laha maegaiye, huta osuta Auneme'aleti'mo Gotifeke'mo mono huta Kalaisi Yesufeke'mo lamogaga aita amuse nehune. 4 Alagepa kavatileti'mo afa'a laha mae'niyesinana alagepa kava'nileti'mo henaga'amo alagepa hu'na mauvesine. Mago vaya'mogi alagepa kavatileti'mo laha maegaiye, hu'a apakesamo afi'nisayana ae'na apakase'nova'mofe'mo alagepa kava'nileti'mo naha maegaiye, hu'na nagesamo afuvesine. 5 Naha maegaiye, hu'na nagesamo afuvesina agufa kava'mo hane'niyana ita'nimo'mo alino nate'nigeno magoke salemo utege'apae'mo nagufamo lagau'a nate'nae. Nagaemo Isaleli vekamo mai'ne'na Menisameni nofi vayapati vekamo mai'nove. Muki naginago vaya'mo Himulu vaya'age'mo mai'nae. Hogote'na Falasi mono vekamo mai'ne'na Yu vaya'ai ke'aepa gemo akame hu'nove. 6 Nagaemo, Goti ali'ya'amo aligesuve, hu'na hute'na lusi kava hu'na nayamukiki hu'na siosi vaya'aitegamo kame hu'na apate'nove. Ke'aepa gemo alagepa hu'na akame hu'noge'a nagete'apae'mo vai'mo o'nami'nae. 7 Hogote'na ani agufa kava'mo hu'na mai'ne'nae'mo, naha maegaiye, hu'na nagesamo afite'na amuse hu'nova'monanafa Kalaisi'a atafausuvafe'mo, naha o'maeno natafauno nategaiye, hu'na nagesamo afi'ne'na atale'nove. 8 Atale'novanage'na hemenimo hu'nae'mo, hogote ya'mo aeno agase'niya ya'mo Ala kava ne'nimo Kalaisi Yesu'a alagi age'na aeto hisuvafeke'mo kanamo ali'ne'nae'mo muki ya'mo ago atale'nove. Hosu'niya ne'ya'mo alini u'a ne'atalaya ne'yakana huno hane'niye, hu'na hute'na Kalaisi'a alisuvafe'mo ali'na yaga au'na atale'nove. 9 Nagaemo ke'aepa gemo akame hute'na nagai'ni fatago kava'nimo ali'novanageno Goti'a nagesiyafe'mo o'nahau'niye. Kalaisifeke'mo nagesa afi'na fatago hu'nogeno Goti'a fatago kava'amo fiku alino nami'nige'na ali'novanageno Goti'a Kalaisipi'mo nageteno'ae'mo, naulagale'mo fatago vekamo mai'nane, huno hisiyafeke'mo nahau'niye. 10 Kalaisi'a age'na aeto hisuvafeke'mo ne'nahaiye. Fali'niyateti'mo he ti'niya himamu'amo'a naipafi'mo ali'ya'mo alisige'na agegesuve. Kanamo ali'niya kavatefe'mo magoke agufa kava hu'na kanamo alisuvafe'mo ne'nahaiye. Fali'niyanage'na atafa naipamo hano hisiyafe'mo falite'na agaekana hu'na maigesuve. 11 Atupale'mo u'na ava'yi hute'na muki fali'naya vayapati'mo alagepa hu'na he tisuvafe'mo amalageka hu'na nayamukiki nehuve.

Polo'a atupale'mo uno ava'yi hisiyafe'mo nagu nagu huno u'niya gemae.

12 Atupale'mo u'na ava'yi osu'nove. Hai'na ohapai'novanage'na atafausuvafe'mo vegala ae'na nagu nagu hu'na u'na atafausuvafe'mo Kalaisi Yesu'a hogoteno natafau'niye. 13 Konaga'nimogitapae, hu'na, atafau'nove, hu'na nagesamo o'afi'na magoke kavafe'mo hu'nae'mo nakamelaga eno ne'viya kava'mo nage kani'na atalete'na naulagati'mo ne'aya kava'mo alisuvafe'mo fai'na alipaili'na nagu nagu hu'na ne'uve. 14 Goti'a anaga kotegamo hai'na maisuvafe'mo Kalaisi Yesuteti'mo nagaefe'mo keya ae'nige'na atupale'mo u'na ava'yi hute'na hetama'nimo alisuvafe'mo nayamukiki hu'na nagu nagu hu'na ne'uve. 15 Ne'uva'mofe'mo alopa vaya'mo haita hapai'nona vaya'mogitamo ani kava huta maigetao. Mago vaya'amogitapa alu lapakesamo ne'afisaya'mo'mo Goti'a mani kava'mo afa'a alino lapave ligiye. 16 Alino apave ligiya'monanafa alino lave li'niya kava'mo akame huteta magoke laipa lagesamo aliteta magoke gemo akame higetao.

17 Konaga'nimogitapae, nehuva kava'mo nagetetapa ani kava'mo hutapa nakame hiyo. Ani kava'mo huta ne'mauna vaya'mo alagepa hutapa lagetetapa lakame hiyo. 18 Mani hemenimo hisuva gemo muki afina'mo lapa pai'novanage'na hemenimo halate mago'e hu'na lapa pai'nae'mo, Asole vaya'mo Kalaisi kame vaya'amo mai'ne'a malipu yosale'mo fali'niya kavafe'mo ava gemo ae'a ati nekae, hu'na hute'na naunumo nelamige'na lapa nepauve. 19 Goti'a alino apago'ya lagauno apatalesige'a alagi lageso hugae. Apakaemo ne'yafeke'mo lusi kava hu'a apakesamo ne'afiya ya'mo goti'apimo'ae. Apavagage hisiya yafeke'mo amuse hu'a ne'atae. Ma mopafi yatefeke'mo apaipa apakesamo ali'a atalageno ne'viya'monanafa 20 lagaemo koku'napi vaya'mo mai'neta koku'napati'mo eminesiya vekamo'a lagufamo alino katino nelateya vekamo Ala kava ne'mo Yesu Kalaisifeke'mo lavayagunagu huta agava ne'maune. 21 Agaemo ayamufa'aleti'mo muki ya'e vaya'e'mo alino aiyafi'mo apateteno yagaino apatesiya ayamufa'aleti'mo hosu lagufamo lokiya o'vaino nekasaliya lagufamo agai'a agufagana agufa lagufamo ha le konali lagufamo alino hamaleno lategaiye.